كيف تعرف الليبي؟ ...أدخل لتعرف

- إذا كان سألته عن الساعة وقاللك كيف امس هالوقت

- تأكد انه يحب بنغازي وعربها

- إذا خلص قرطاس "علبة" الدخان لازم يعفسها بيده قبل ما يرميها

- تحت كرسي السيارة حبلة والا يد الكريك

- لما يكمل السبسي يعفس عليه ويقوللك هلكنا الدخان قطع صحتنا
وجيوبنا

- اذا كان شراء خبزة لازم ياخد منها كسرة وخصوصا الخشم القرماشي واحيانا فردة تعدي في الطريق وخصوصا كانهى ساخنة من الكوشة

- اذا كان حلف لك بالله وعرفك
مش مصدقه ، كانهو قالك وراس العزوز والا الشياب راهو صادق ، ولكانهو حلف براسك راهو راسك عدا فيها وكذب عليك.

- كانهو بحت في الشمس وكسر عين وفتح عين وحط يده فوق حجاجه وقال الشمس اليوم قوية

- كانهو اسمه امراجع معش تسأل 100% ليبي.

- كانهو درس السيارة في القراج بسرعة 60 كم/س راهو ليبي

- كانهو حط مفتاح الدتسون كله في وذنه راهو ليبي.

- كان لقيت رولة مقلوبة تأكد ان سائقها ليبي.

- كانهو في الصبح قالك خير بدون كلمة صباح راهو ليبي

- كانهو حق أي طابور والا زحمة يخش فيها بدون ما يعرف عليش
- كان شاف عركة يخش يحز وبعدها يتكها معاهم ويقعد عنصر اساسي في المشكلة.

- كانهو حك راسه تحت الطقية والا الشنة راهو يبي يمشي عليك بضاعة عطيبة افطن لروحك.

- كانهو قاللك احسن سيارة هوندا 79 كسبتها والله يسامحها

- أي شيء ايضيفوه له يعقب منه شويا الا اللحمة يكملها وخصوصا اللحيمة الوطنية.

- كانهو حط الكشيك في العظم وطلع المخ راهو ليبي والا خبط العظم على السفرة علشان يطلع المخ.

- كانهو قرقض العظم حتى لوكان في فمه سن وحدة واتخلخل.

- ديما مستعجل

- يكره اسرائيل وحلمه وفى أولوياته تحرير القدس

- كانك لقيت حد يسال في عريس ثاني يوم دخلته ويقوله ما فيش حاجة على الطريق؟

- كانك عطست وقالك طار السوء

- كانك لقيت يسب في الليبيين ويفتخر بكونه ليبي راهو ليبي100%

- كانهو ولع سبسي من سبسي راهو ياما فرحان والا راقيتله ما فيش حل وسط.

- كانهو قالك بيش الدحي والا الكرموس والا الدلاع والا البكيوه راهو ليبي

- كانهو قال لاميته ، فركيته ،كشيك، كنتيره ، موتانتي ، مراميته ، زميطه ، بازين ،

- كانهو لقيته يأكل في المكرونة بالخبزة راهو ليبي

- كانهو لقيته يأكل وينفخ في الأكل لان الأكل يا ساخن او حار

- كانهو لقا طنجرة طبيخة على الغاز لزم يغمس فيها خبزة ويقوللك
طنجرتك يا مشيطة يا ناقصة ملح "لازم يعلق"

- كانهو قمعز قدام النار لازم يحركها بعود حطب ويقوللك ناركم بالهون

- كانهو كملت عليه شيشة الشامبو لازم يزيدها اميه

- كانهو يسمع في نشرة الاخبار لازم يقول - ا س اس - حتى لو كانهو بروحه ما معاه حد

- كانهو غسل يديه لازم يطرطش علي إحداه اميه

- لو لقاء حد واقف على الطريق لازم ايوصله بسيارته

- كانهو دارلك رنة وسكر وقاللك كنك ما ترد علينا يا

- كانهو لقاء خبزة امطوحة ياخذها ويحولها على جنب ويقول حرام
عزق النعمة لكن عادي يعزق الرز والمكرونة والدقيق كل شىء الا الخبزة !

- ما يرضاش الظلم حتى على غيره وخصوصا كانهوا لقاءك غريب

- لو لقاء حد عاطلة عليه سيارته يوقف ويساعده واذا لقاء عجلة
سيارته مفشوشة أول سؤال يسأله له عندك اكريك؟

- كانهو صوت الإمام سمح بعد ما يقول الإمام ولا الضالين كلهم
يلحنوا امييييييييييين وبصوت عالي وكانهو مش عاجبهم صوت الإمام عد الله صلاة سرية ظهر والا عصر امين يادوب ما تسمعها

- السوداني اللي عاش في ليبيا قال اغرب شيء في الليبيين

1- الفحم الاسود يقولوا عليه بياض وانا يقوللولي يا لبيض
2- الاعمى يقولوا عليه بصيروالبصير اللي بيلبس نضارة بينادوه يالعمى
3- السخان يقولوا عليه براد
4- والى الحين ما عرفت النبي سبسي اللي بيحكو عليه ولما يقولوا عليه بيديلوه سيجارة.
5- شيشة مية الكفرة في النهار بنص دينار وبالليل بعشرة دينار عجيبين يااخي!
6- المكرونة بياكلوها في الفطور والغداء والعشاء وأحيانا في السحور!
7- ع الطويل يقولوا "الطول اهبال" والقصير"القصر مصيبة" والسمين "دبه" والرفعيع يقولوا "امصفط" ويبلد في المطر
8- والمدمريقولوا عليه معمر بعد 20 اكتوبر 2011 اصبح المردوم
كانك ضحكت كيف ضحكة اوباما على مليونيات المردوم معناها انت ليبي وليبي حر

ههههههههههههههههههههه